ខេត្តសៀមរាប:សមត្ថកិច្ចនគរបាលខេត្តសៀមរាបបានឱ្យដឹងថា ជនសង្ស័យប៉ុនប៉ងមនុស្សឃាតដោយចេតនា ឈ្មោះ ស៊ី លឿយ ត្រូវបានកម្លាំងសមត្ថកិច្ចនគរបាលខេត្តសៀមរាបចាប់ឃាត់ខ្លួនបានហើយនៅថ្ងៃទី ៥ ខែធ្នូ ឆ្នាំ២០២៤នេះ ពីបទ ប៉ុនប៉ងមនុស្សឃាត ដោយចេតនា ដោយប្រើប្រាស់អាវុធកែច្នៃបាញ់ ទៅលើជនរងគ្រោះ ជាអ្នកសារព័ត៌មាន ខណៈជនរងគ្រោះចុះទៅយកព័ត៌មានករណីឈូសឆាយដីព្រៃ បណ្តាលឱ្យរងគ្រោះរងរបួសជាទម្ងន់ ។
សមត្ថកិច្ចបន្តថា បន្ទាប់ពីទទួលបានពាក្យបណ្តឹងរបស់ជនរងគ្រោះ កម្លាំងនគរបាលខេត្តសៀមរាប ក្រោមបញ្ជាផ្ទាល់របស់លោកឧត្តមសេនីយ៍ទោហួត សុធី ស្នងការនគរបាលខេត្តសៀមរាប ដោយមានការសម្របសម្រួលតាមនីតិវិធី បានចុះបញ្ជាការចាប់ខ្លួនជនសង្ស័យបានភ្លាមៗតែម្តង នៅថ្ងៃទី ៥ ខែធ្នូ ឆ្នាំ ២០២៤ នេះបន្ទាប់ពីជនសង្ស័យរូបនេះបានបាញ់ប្រហារដោយប្រើកាំភ្លើងកែច្នៃទៅលើជនរងគ្រោះចំនួន១គ្រាប់ កាលវេលាម៉ោង១៨ និង ០០នាទីថ្ងៃទី ៤ ខែធ្នូ ឆ្នាំ២០២៤ រំលងបាន១ថ្ងៃ ។
ជនសង្ស័យ ឈ្មោះ ស៊ី លឿយ ភេទប្រុស អាយុ ៤០ ឆ្នាំ ទីលំនៅ ភូមិសាលា ឃុំគោកធ្លកលើ ស្រុកជីក្រែង ខេត្តសៀមរាប ។ សមត្ថកិច្ចក៏បានរឹបអូសមកជាមួយនូវវត្ថុតាងអាវុធកែច្នៃផងដែរ ។
សមត្ថកិច្ចដដែលបានបញ្ជាក់ទៀតថា ចំណែកជនរងគ្រោះ ឈ្មោះ ឈឿង ឈឹង ភេទប្រុសអាយុ៦៣ឆ្នាំ មុខរបរ អ្នកយកព័ត៌មានកម្ពុជាអភិវឌ្ឍន៍ រស់នៅភូមិឃុំកន្លែងកើតហេតុខាងលើ ។ ហេតុការណ៍បាញ់ប្រហារបានកើតឡើង នៅភូមិត្រពាំងភ្លោះ ឃុំពង្រលើ ស្រុកជីក្រែង ខេត្តសៀមរាប នៅវេលាម៉ោង១៨ និង ០០នាទីថ្ងៃទី ០៤ ខែធ្នូ ឆ្នាំ២០២៤ ខណៈពេលដែលជនរងគ្រោះ បានចុះទៅយកព័ត៌មានសកម្មផាពឈូសឆាយដីព្រៃមួយកន្លែង នៅភូមិខាងលើខណៈពេលជនរងគ្រោះចុះទៅដល់ទីតាំងកើតហេតុភ្លាម ក៏ស្រាប់តែជនសង្ស័យ ស៊ី លឿយ បានប្រើប្រាស់កាំភ្លើងកែច្នៃ បាញ់ប្រហារទៅលើជនរងគ្រោះ លោក ឈឿង ឈឹង តែម្តង បណ្តាលរងគ្រោះជាទម្ងន់ ដោយគ្រាប់បៀមក្នុងសាច់ ។
បច្ចុប្បន្ន ជនរងគ្រោះកំពុងសំរាកព្យាបាល នៅមន្នីរពេទ្យ ។ ចំណែកជនសង្ស័យ ដែលសមត្ថកិច្ចឃាត់ខ្លួន កំពុងសួរនាំបន្ថែមដើម្បីចាត់ការបន្តតាមនីតិវិធី ៕
