បន្ទាយមានជ័យ:រដូវនេសាទរយៈពេល ៦ ខែបានចាប់ផ្ដើមបើកឲ្យប្រជាពលរដ្ឋខ្មែរនេសាទជាលក្ខណៈគ្រួសារ ដើម្បីយកត្រីទាំងនោះមកធ្វើផ្អក ប្រហុក ត្រីងៀត ត្រីឆ្អើរ ទុកសម្រាប់ជីវភាពប្រចាំថ្ងៃ ក្នុងរដូវវស្សាធ្វើស្រែចំការដែលជា រដូវបិទការនេសាទ។ ការធ្វើបែបនេះជាទំនៀមទំលាប់របស់ប្រជាពលរដ្ឋខ្មែរដែលមានតាំងពីយូរយារណាស់មកហើយ។ លោកមាឃ មករា ប្រជានេសាទរស់នៅឃុំតាប៉ុនស្រុកព្រះនេតព្រះខេត្តបន្ទាយមានជ័យបានឲ្យដឹងថា ជារៀងរាល់ឆ្នាំគ្រួសារលោកតែងតែនេសាទត្រីនៅរដូវបើកឱ្យនេសាទដោយប្រើឧបករណ៍ស្របច្បាប់ ដើម្បីចាប់យកត្រីទាំងនេះមកធ្វើជាផ្អកប្រហុកត្រីឆ្អើរត្រីងៀតទុកសម្រាប់ហូរប្រចាំថ្ងៃ។ លោកបន្តថា នៅឆ្នាំនេះគ្រួសារលោកមិនបានទិញពីគេយកមកធ្វើផ្អកប្រហុកនោះទេគឺលោកបាននេសាទដោយខ្លួនឯងជាលក្ខណៈគ្រួសារកាលពីពេលមុនធ្លាប់ទិញពីគេផងនេសាទដោយខ្លួនឯងផង។ លោកបានបន្តទៀតថា ឆ្នាំនេះត្រីសំបូរ បើប្រៀបធៀបនិងឆ្នាំមុន។ត្រីចាប់ផ្ដើមត្រូវតាំងពីចុងខែ ១២ ចូលដល់ខែ ១ត្រូវខ្លាំង ភាគច្រើនជាប្រភេទត្រីចម្រុះអាចយកទៅធ្វើផ្អកប្រហុកត្រីងៀតត្រីឆ្អើរ បានតាមតំរូវការ។ លោកបន្តទៀតថា ក្រៅពីការនេសាទតាមដៃទន្លេនិងបឹងលោកបានទៅម៉ៅស្រះឬបៀររបស់ប្រជាពលរដ្ឋនៅតាមភូមិដើម្បីបូមចាប់ត្រីសម្រាប់ខ្លួនឯងផង និង លក់ចែកចាយបន្តដល់ប្រជាពលរដ្ឋ ដើម្បីយកទៅធ្វើផ្អកប្រហុកត្រីងៀតត្រីឆ្អើរផងដែរ។ លោកមេឃមករាបានបន្តទៀតថា រីឯតម្លៃត្រីក្នុងមួយគីឡូក្រាមពី ១,០០០ ទៅ ១៥,០០០ រៀលឬពាន់រៀលតម្លៃនេះប្រហាក់ប្រហែលនិងតម្លៃឆ្នាំមុនៗដែរ។។ អាជ្ញាធរនិងមន្ត្រីជំនាញជលផលមូលដ្ឋានភូមិស្រុកខាងលើបានឱ្យដឹងថា លោកមានការត្រេកអរដោយឃើញធនធានជនផលមានការកើនឡើង បើប្រៀបនឹងឆ្នាំនេះនិងឆ្នាំមុនៗឆ្នាំនេះត្រូវកើនឡើងនិងសម្បូរជាងឆ្នាំមុន។ហើយឃើញបងប្អូនប្រជាពលរដ្ឋមូលមីនាំគ្នានេសាទជាលក្ខណៈគ្រួសារដើម្បីយកត្រីទាំងនេះធ្វើជាផ្អកប្រហុកត្រីងៀតត្រីឆ្អើរទុកសម្រាប់ហូបទៅថ្ងៃខាងមុខ។ អាជ្ញាធរមូលដ្ឋាននិងមន្ត្រីជំនាញជលផលខាងលើបានបញ្ជាក់និងសំណូមពរថា សូមឱ្យបងប្អូនប្រជាពលរដ្ឋក៏ដូចជាប្រជានេសាទត្រូវអនុវត្តទៅតាមច្បាប់នេសាទនិងការណែនាំរបស់មន្ត្រីជលផល។មិនត្រូវនេសាទនៅរដូវត្រីពងបន្តពូជនិងកុំប្រើប្រាស់ឧបករណ៍ណាដែលខុសច្បាប់កុំកាប់បំផ្លាញព្រៃលិចទឹកជាចម្រកត្រីពង ដើម្បីចាប់ត្រីវាបានធ្វើឲ្យប៉ះពាល់ដល់ធនធានធម្មជាតិ។ដោយ(ស្រី ជួប)
