ខេត្តប៉ៃលិន ៖ រហូតមកដល់ពេលនេះសមត្ថកិច្ចចម្រុះចុះឆែរឆេរទីតាំងមួយចំនួនកាលពីថ្ងៃទី០៣ ខែកុម្ភៈ ឆ្នាំ២០២៦ នៅតាមបណ្តាសណ្ឋាគារ ផ្ទះសំណាក់ និងកាស៊ីណូ ដែលស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយរុករកអ្នកដែលប្រព្រឹត្តបទល្មើសអនឡាញ ដើម្បីធ្វើការបង្ក្រាបទាន់ពេលវេលា។
សមត្ថកិច្ចនគរបាលបានបញ្ជាក់ថា ក្រោយពីមានការណែនាំពីលោកជំទាវ បាន ស្រីមុំ អភិបាលខេត្តប៉ៃលិន បន្តជំរុញឱ្យកម្លាំងសមត្ថកិច្ច និងមន្ត្រីជំនាញ អាជ្ញាធរមូលដ្ឋាន ត្រូវតែចុះអនុវត្តន៍អោយបានតឹងរឹងលើករណីបទល្មើសនានាមិនឱ្យកើតមានក្នុងមូលដ្ឋានរបស់ខ្លួនជាដាច់ខាត។
លោកជំទាវអភិបាលខេត្ត ក៍បានជំរុញឱ្យកម្លាំងសមត្ថកិច្ច និងអាជ្ញាធរមូលដ្ឋាន ត្រូវអនុវត្តន៍ ការពង្រឹងការអនុវត្តច្បាប់ និងការបង្ក្រាប ឲ្យបានម៉ឺងម៉ាត់ ត្រូវតាមដាន និងរុករកស្រាវជ្រាវ ការកំណត់មុខសញ្ញា និងទីតាំង ដែលសង្ស័យថា មានការបង្កប់នូវល្បែងស៊ីសងអនឡាញ ឬការឆបោកតាមប្រព័ន្ធបច្ចេកវិទ្យា (Cybercrime)។
ហើយរាល់បទល្មើសអនឡាញទាំងអស់ ដែលបានរកឃើញ ត្រូវចាត់វិធានការតាមផ្លូវច្បាប់ជាធរមាន ដោយមិនត្រូវមានការអន្តរាគមន៍ ឬយោគយល់ឡើយ ដើម្បីរក្សាសន្តិសុខក្នុងខេត្តឱ្យមានសុវត្ថិភាព។
លោកជំទាវអភិបាលខេត្តបានបញ្ជាក់ថា ការចូលរួមពីអាជ្ញាធរមូលដ្ឋាន ជាពិសេសអាជ្ញាធរក្រុង ស្រុក ឃុំ/សង្កាត់ គឺជាភ្នែកច្រមុះ ដែលជាអវយវៈដ៏សំខាន់ គឺត្រូវចុះពិនិត្យតាមដានទីតាំងជួលផ្ទះ សណ្ឋាគារ ឬកន្លែងអាជីវកម្មផ្សេងៗ ដែលអាចផ្តល់ជម្រកដល់ក្រុមឧក្រិដ្ឋជនអនឡាញគ្រប់រូបភាព ។
លោកជំទាវ បាន ស្រីមុំ អភិបាលខេត្តប៉ៃលិន ក៏បានណែនាំ ឱ្យមានការផ្សព្វផ្សាយ ដល់ប្រជាពលរដ្ឋក្នុងមូលដ្ឋាន កុំឱ្យចាញ់បោកការអូសទាញ បោកបញ្ឆោត តាមរយៈការងារដែលមានប្រាក់ខែខ្ពស់ខុសធម្មតា ឬការវិនិយោគតាមអនឡាញ ដែលគ្មានប្រភពច្បាស់លាស់។ ជាមួយគ្នានេះ ដែរត្រូវលើកទឹកចិត្ត ឱ្យប្រជាពលរដ្ឋរាយការណ៍ជាបន្ទាន់ដល់សមត្ថកិច្ចដែលនៅក្បែរ ប្រសិនបើឃើញសកម្មភាពសង្ស័យណាមួយ នៅក្នុងសហគមន៍មូលដ្ឋាន៕ ដោយ ៖ នាក់ ង៉យ