ឧត្តរមានជ័យ:នាពេលថ្មីៗនេះ បន្ទាប់ពីទទួលបានព័ត៌មានពីប្រជាពលរដ្ឋជាបន្តបន្ទាប់មកថាមានចោរ១ក្រុមចេះតែដើរធ្វើសកម្មភាពលួចនៅតាមខ្នងផ្ទះអ្នកស្រុកបាត់របស់របរជាច្រើន នេះបើយោងតាមរបាយការណ៏របស់សមត្ថកិច្ចជំនាញនៅថ្ងៃទី០២ខែវិច្ឆិកាឆ្នាំ២០២៥។
ជាក់ស្តែងដោយមានការចង្អុលបង្ហាញផ្ទាល់ពី លោកឧត្តមសេនីយ៍ទោ ខូវ លី ស្នងការនគរបាលខេត្ត និងការដឹកនាំពី លោកវរសេនីយ៍ឯក ហម ភិរក្ស ស្នងការរង ទទួលផែនការងារនគរបាលព្រហ្មទណ្ឌ នៅអំឡុងយប់ថ្ងៃទី២៩ ខែតុលា ឆ្នាំ២០២៥ កន្លងទៅនេះលោកវរសេនីយ៍ឯក ស៊ូ នូវ អធិការនគរបាលស្រុក បានដឹកនាំកម្លាំងផែនការងារនគរបាលយុត្តិធម៌ និងកម្លាំងប៉ុស្តិ៍រដ្ឋបាលអន្លង់វែង ចុះល្បាតពួនស្ទាក់ និងស្រាវជ្រាវឈានដល់ការបង្រ្កាបចាប់ឃាត់ខ្លួនជនសង្ស័យជាមុខសញ្ញាចោរអម្បុកអម្បែង បន្តបន្ទាប់ចំនួន ៣នាក់ ដែលជាមុខសញ្ញាលួចកាត់ខ្សែភ្លើង លួចគាស់ផ្ទះ លួចយករបស់របរប្រជាពលរដ្ឋយ៉ាងសកម្មក្នុងភូមិសាស្រ្តទីរួមស្រុកអន្លង់វែង នាពេលកន្លងមក និងដកហូតវត្ថុតាងខ្សែភ្លើងដុតយកលួសមួយចំនួន ម៉ូតូម៉ាក់វ៉េវ ចាស់ ១ គ្រឿង និងកង់ ១ ជាមធ្យោបាយជិះធ្វើសកម្មភាពកន្លងមក ដង្កាប់សម្រាប់កាត់ខ្សែភ្លើងចំនួន២ មានឈ្មោះដូចខាងក្រោម។/១ ឈ្មោះ ញ៉េន ហាន ភេទប្រុស អាយុ ៤៤ឆ្នាំ រស់នៅភូមិប្រលាន ឃុំអន្លង់វែង ស្រុកអន្លង់វែង មុខរបរមិនពិតប្រាកដ ជាមុខសញ្ញាដើររើសអេតចាយនៅពេលយប់។
២/ ឈ្មោះ ឡូញ ថាវរ៉ាត់ ( ហៅ រ៉ាតើ ) ភេទប្រុស អាយុ ៣៦ឆ្នាំ ស្នាក់នៅភូមិអូរជញ្ជៀន ឃុំអន្លង់វែង ស្រុកអន្លង់វែង មុខរបរមិនពិតប្រាកដ ជាមុខសញ្ញាដើររើសអេតចាយនៅពេលយប់។
៣/ ឈ្មោះ ចាន់ សុភី ភេទប្រុស អាយុ ៣២ឆ្នាំ ស្នាក់នៅភូមិអូរជញ្ជៀន ឃុំអន្លង់វែង ស្រុកអន្លង់វែង មុខរបរមិនពិតប្រាកដ។
នៅចំពោះមុខសមត្ថកិច្ច ជនសង្ស័យ បានឆ្លើយសារភាពថា ខ្លួនពិតជាបានធ្វើសកម្មភាពលួចកាត់ខ្សែភ្លើង លួចគាស់ផ្ទះ លួចយកចានឆ្នាំង និងលួចយកទ្រព្យសម្បត្តិរបស់ប្រជាពលរដ្ឋ នាពេលកន្លងមកពិតមែន ដោយខ្សែភ្លើងខ្លួនយកទៅដុតយកលួស រួចយកទៅលក់រួមទាំងរបស់របរផ្សេងទៀតដែលពួកខ្លួនលួចបាន ទៅឱ្យអ្នកដើរទិញអេតចាយ។
ឆ្លងតាមការស្រាវជ្រាវរបស់សមត្ថកិច្ច និងចម្លើយសារភាពរបស់ជនសង្ស័យឃើញថា ក្រុមនេះជាមុខសញ្ញាប្រភេទចោរអម្បុកអម្បែងតែងតែធ្វើសកម្មភាពលួចយ៉ាងសកម្មមិនរើសមុខ ប៉ះអីយកហ្នឹង ហើយកន្លងមកក៏ធ្លាប់បានបង្ក្រាបចាប់បញ្ជូនទៅដាក់ពន្ធនាគាររួចមកហើយដែរ តែពេលចេញមកវិញបានតែមួយរយៈខ្លី ក៏ចាប់ផ្តើមធ្វើសកម្មភាពលួចសារជាថ្មីទៀតមិនរាងចាលឡើយ។
សម្ភារ:ដែលក្រុមជនសង្ស័យខាងលើនេះធ្លាប់លួចយកកន្លងមក រួមមាន ៖
១/ខ្សែភ្លើងខ្សែភ្លើងប្រហែលប្រវែង ៥៥០ ម៉ែត្រ។
២/ឆ្នាំងស្ងោរនំចំនួន ៣។
៣/ចានដែកចំនួន ៥។
៤/កាបូបសម្រាប់លក់ចំនួន ៣០ កាបូប ។
៥/កង្ហារ ចំនួន ២។
៦/អាគុយចំនួន ៣ ។
៧/ក្បាល DTV ចំនួន១ ។
៨/អាំងម៉ូទ័រសម្រាប់បញ្ចូលអាគុយចំនួន១ ។
៩/ដងសន្ទូចសម្រាប់ស្ទូចត្រីចំនួន ១ឈុត។
១០/ចាន ឆ្នាំង កាំបិត កំប៉ុងស្រាបៀរ និងរបស់របរមួយចំនួនទៀត ។
បច្ចុប្បន្នជនសង្ស័យទាំង៣នាក់ និងវត្ថុតាងខាងលើ សមត្ថកិច្ចបានកសាងសំណុំរឿងបញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធី។ ( ឈឿន ប៊ុនឈី )