ឧត្តរមានជ័យ:រថយន្តក្រុងប្រភេទទេសចរណ៏៤៥កៅអីមួយគ្រឿង បើកបរបោះពួយយ៉ាងលឿនបានរេចង្កូត បុកចូលផ្ទះប្រជាពលរដ្ឋទាំងកម្រោលបង្កការភ្ញាក់ផ្អើលទៅដល់អ្នកភូមិព្រមទាំងអ្នកធ្វើដំណើរភ័យស្លន់ស្លោរត់ឆ្លេរឆ្លានាំគ្នារត់ចេញពីក្នុងឡានត្រៀបត្រាពេញផ្លូវ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅលើផ្លូវជាតិលេខ៦៨ស្ថិតនៅក្នុងភូមិ(ក)ខាងត្បូងផ្សារភូមិ(ក)ចម្ងាយ១០០ម៉ែត្រជាង ឃុំចុងកាល់ ស្រុកចុងកាល់ ខេត្តឧត្តរមានជ័យ កាលពីវេលាម៉ោង៦ព្រឹកថ្ងៃទី០១ខែមេសាឆ្នាំ២០២៥ នេះ។
ប្រភពពីកន្លែងកើតហេតុបានឲ្យដឹងថាមុនដំបូងឡើយគាត់បានឃើញរថយន្តក្រុងពណ៌សខាងលើនេះបើកទិសដៅពី ត្បូងទៅជើងលុះមកដល់ចំណុចកើតហេតុទំនងជាតៃកុងងោកមួយភាំងក៏បានរ៉េចង្កូតធ្លាក់ផ្លូវ ឆ្ពោះទៅមុខចូលផ្ទះប្រជាពលរដ្ឋទាំងកម្រោលតែម្ដង ។
សាក្សីនៅទីតាំងកើតហេតុផ្ទាល់បានអះអាងបន្តថា ឡានក្រុងពណ៌សដែលបុកចូលផ្ទះប្រជាពលរដ្ធនេះដែរត្រូវគេស្គាល់ថា ជាក្រុមហ៊ុន(ធីវរ:ដឹកអ្នកដំណើរមានទីតាំងស្ថិតនៅក្នុងក្រុងសំរោង ខេត្តឧត្តរមានជ័យ)។
សមត្ថកិច្ចមូលដ្ឋាននៅកន្លែងកើតហេតុបានឲ្យដឹងថាចំពោះករណីនេះពុំមានបង្កគ្រោះថ្នាក់ដល់មនុស្ស និងអ្នកធ្វើដំណើរឡើយគ្រាន់តែខូចខាត សម្ភារៈ របស់អ្នកផ្ទះតែប៉ុណ្ណោះ ។
សូមជម្រាបផងដែរថាក្រោយកើតហេតុរួច ខាងក្រុមហ៊ុនឡានក្រុងបានព្រមសងសំណងទៅដល់ម្ចាស់ផ្ទះនិងបានហៅរថយន្តស្ទូចដើម្បីស្ទូចយកទៅខេត្តសៀមរាបធ្វើការជួសជុលនៅព្រឹកនេះផងដែរ។ ( ដោយឈឿន ប៊ុនឈី )
