ខេត្តប៉ៃលិន ៖ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេស នៅព្រឹកថ្ងៃទី១៦ ខែកញ្ញា ឆ្នាំ២០២២នេះ បានដាក់នូវបទបញ្ជាចំនួន៣ចំនុចសំខាន់ៗ សម្រាប់មេបញ្ជាការកងរាជអាវុធហត្ថខេត្តប៉ៃលិនដែលទើបប្រកាសចូលកាន់មុខតំណែងហើយថ្មីៗ នេះ ទី១. ត្រូវធ្វើឱ្យពលរដ្ឋ និងភ្ញៀវទេសចរណ៍ស្រលាញ់កងរាជអាវុធហត្ថខេត្តប៉ៃលិនទាំងមូលទី២. សាមគ្គីភាព និងឯកភាពផ្ទៃក្នុង ទី៣. ត្រូវអនុវត្តន៍ការងារទៅតាមឋានានុក្រម។
ពិធីប្រកាសមុខតំណែង មេបញ្ជាការ កងរាជអាវុធហត្ថខេត្តប៉ៃលិន នាពេលនេះ មានការចូលរួម ពីឯកឧត្ដម ជា ចាន់ឌិន ប្រធានក្រុមប្រឹក្សាខេត្ត លោកហុក សុផល អភិបាលរងខេត្ត តំណាងលោកជំទាវ បាន ស្រីមុំ អភិបាលខេត្តប៉ៃលិន ក្រុមការងាររដ្ឋបាលខេត្ត កងកម្លាំងប្រដាប់អាវុធ មន្ទីរ អង្គភាព នានាជុំវិញខេត្តផងដែរ។
ឯកឧត្តម នាយឧត្តមសេនីយ៍បានសង្កត់ធ្ងន់ថា រឿងទាំង៣នេះ ទាមទារឱ្យលោកឧត្តមសេនីយ៍ត្រី កែវ សុផល មេបញ្ជាការកងរាជអាវុធហត្ថខេត្តប៉ៃលិនក្រោយចូលកាន់ដំណែងរួចរាល់ ត្រូវធ្វើឱ្យបាន ហើយការអនុវត្តន៍ការងារទៀតសោត ស្នាដៃមុខមាត់ មិនមែនជារឿងសំខាន់នោះទេ សំខាន់ធ្វើយ៉ាងណាកុំឱ្យ
មានបទល្មេីសច្រេីនក្នុងមូលដ្ឋាន
ខេត្តប៉ៃលិន។
ឯកឧត្តមបន្តថា ការតែងតាំងដំឡើង ផ្លាស់ប្តូរមុខតំណែង កន្លែងធ្វើការ នៅក្នុងកងកម្លាំងប្រដាប់អាវុធ មន្ត្រីរាជការស៊ីវិល ក៏ដូចជាវិស័យឯកជន នោះគឺជាក្រឹត្យក្រមនៃការងារចាត់តាំង រៀបចំធនធានមនុស្ស ដើម្បីភាពរីកចម្រើនការងារ និងក៏ជាឱកាសនៃការផ្លាស់ប្តូរបរិយាកាស ទីកន្លែងធ្វើការងារ ការផ្លាស់ប្តូរមុខតំណែងគឺមានអត្ថប្រយោជន៍ ៤ជាគន្លឹះ ៖ ទី១- ដើម្បីការពារកិត្តិយស និងសេចក្តីថ្លៃថ្នូររបស់នាយទាហាន។ ទី២- រៀបចំធនធានមនុស្សឱ្យស្របនិងសមត្ថភាពជំនាញ និងនិស្ស័យ។ ៣- ជាការផ្តល់ឱកាសសម្រាប់អ្នកបន្តវេន និងទី៤- ជាការចែករំលែកបទពិសោធន៍ល្អ ក្នុងបំណងធ្វើឱ្យអង្គភាព ស្ថាប័នរីកចម្រើនព្រមៗគ្នា។
លោកឧត្តមសេនីយ៍ត្រី កែវ សុផល បានប្តេជ្ញាចិត្តយ៉ាងអង់អាចក្នុងការការពារសន្តិភាព ការពារសមិទ្ធផលរបស់គណបក្សប្រជាជន ដែលសម្រេចបាននាពេលកន្លងមក។
គួរបញ្ជាក់ថា លោកឧត្តមសេនីយ៍ត្រីកែវ សុផល អតីតមេបញ្ជាការកងរាជអាវុធហត្ថខេត្តកំពត ត្រូវបានផ្លាស់ប្តូរមុខតំណែងមកជា មេបញ្ជាការកងរាជអាវុធហត្ថខេត្តប៉ៃលិន ជំនួសលោកឧត្ដមសេនីយ៍ត្រី វ៉ាន់ ណាឡុង ទៅជាសមាជិកក្រុមស្រាវជ្រាវយុទ្ធសាស្រ្តយោធា ថ្នាក់អគ្គបញ្ជាការដ្ឋាន នៃក្រសួងការពារជាតិ៕ ដោយ ៖ នាក់ ង៉យ
