ស្លូវ៉ាគី៖ ជុំវិញការណីប៉ុងប៉ងបាញ់សម្លាប់លើលោកនាយករដ្ឋមន្ត្រីស្លូវ៉ាគី រ៉ូប៊ើត ហ្វីកូ (Robert Fico) បានធ្វើឱ្យប្រធានាធិបតីបារាំង អ៊ែមម៉ានូអ៊ែល ម៉ាក្រុង (Emmanuel Macron) បានបង្ហាញអារម្មណ៍ភ្ញាក់ផ្អើលជាខ្លាំង តាមរយៈគណនីរបស់លោកនៅលើបណ្តាញសង្គម X ដោយប្រមុខដឹកនាំរបស់បារាំងបានថ្កោលទោសចំពោះហេតុការណ៍វាយប្រហារនេះ។
ក្រៅពីប្រមុខដឹកនាំបារាំង ប្រធានាធិបតីរុស្ស៊ី វ្ល៉ាឌីមៀ ពុទីន និងប្រធានាធិបតីអាម៉េរិក ចូ បៃដិន ស្ថិតនៅក្នុងចំណោមដៃគូសហភាពអឺរ៉ុបរបស់ប្រទេសស្លូវ៉ាគី ក៏បានបង្ហាញការភ្ញាក់ផ្អើល និងថ្កោលទោសចំពោះហេតុការណ៍បាញ់ប្រហារនាពេលនេះផងដែរ ។
ក្រោយហេតុការណ៍ប៉ុនប៉ងបាញ់សម្លាប់នោះ នាយករដ្ឋមន្ត្រីវ័យ ៥៩ឆ្នាំ លោក រ៉ូប៊ើត ហ្វីកូ (Robert Fico) ត្រូវបានបញ្ជូនទៅកាន់មន្ទីរពេទ្យភ្លាមៗ និងដឹកតាមឧទ្ធម្ភាគចក្រទៅកាន់ទីក្រុង ប៊ែនស្កា បាយស្ទ្រីកា (Banska Bystrica) ដើម្បីសង្គ្រោះជាបន្ទាន់ ។
ថ្លែងប្រាប់ទៅកាន់ទីភ្នាក់ងារសារព័ត៌មាន Reuters សាក្សីម្នាក់បានអះអាងថា ខ្លួនបានឮស្នូរសំឡេងនៃការបាញ់ប្រហារដោយកាំភ្លើងជាច្រើនគ្រាប់ ភ្លាមៗបន្ទាប់ពីបញ្ចប់កិច្ចប្រជុំរដ្ឋាភិបាល ស្ថិតនៅឯទីក្រុង ហ៊ែនឡូវ៉ា (Handlova) ភាគឦសានរដ្ឋធានីប្រាទីស្លាវ៉ា (Bratislava) កាលពីថ្ងៃពុធ ។
នៅក្នុងសន្និសីទសារព័ត៌មានមួយក្នុងថ្ងៃដដែលនេះ រដ្ឋមន្ត្រីក្រសួងការពារជាតិស្លូវ៉ាគី លោក រ៉ូប៊ើត កាលីណាក់ (Robert Kalinak) បានលើកឡើងថា ការប៉ុនប៉ងបាញ់សម្លាប់លើលោកនាយករដ្ឋមន្ត្រី រ៉ូប៊ើត ហ្វីកូ (Robert Fico) គឺជាការវាយប្រហារផ្នែកនយោបាយ ។
ក្នុងពេលដំណាលគ្នានោះ រដ្ឋមន្ត្រីក្រសួងមហាផ្ទៃ លោក ម៉ាទូស ស៊ូតាច់ អេស្តុក (Matus Sutaj Estok) បានបញ្ជាក់ដែរថា លោកនឹងមិនទាន់បង្ហាញព័ត៌មានលម្អិតអំពីអ្នកបាញ់ប្រហារនៅពេលនេះទេ អ្វីដែលយើងទាំងអស់គ្នាបានដឹង គឺវាជាផ្នែកមួយពាក់ព័ន្ធនឹងការវាយប្រហារក្រោមហេតុផលនយោបាយ ។ រដ្ឋមន្ត្រីមហាផ្ទៃ បានបន្ថែមទៀតថា លោកនាយករដ្ឋមន្ត្រីស្លូវ៉ាគី ស្ថិតនៅក្នុងស្ថានភាពគម្រាមកំហែងដល់អាយុជីវិត ក្រោយទទួលរងការបាញ់ប្រហារដោយខ្មាន់កាំភ្លើង បន្ទាប់ពីលោកចាកចេញពីកិច្ចប្រជុំរដ្ឋាភិបាល ។
ថ្លែងទៅកាន់សន្និសីទសារព័ត៌មានមួយ រដ្ឋមន្ត្រីក្រសួងមហាផ្ទៃ បានបញ្ជាក់ដែរថា ក្នុងហេតុការណ៍នេះ ខ្មាន់កាំភ្លើងបានបាញ់ប្រហារលើលោកហ្វីកូចំនួន ៥ ដង ធ្វើឱ្យលោកនាយករដ្ឋមន្ត្រីស្ថិតក្នុងស្ថានភាពធ្ងន់ធ្ងរ ប៉ុន្តែទោះជាបែបណាក្តី នៅល្ងាចថ្ងៃពុធ លោកទទួលបានការវះកាត់ជាច្រើនម៉ោង ខណៈខ្មាន់កាំភ្លើងត្រូវសមត្ថកិច្ចចាប់ខ្លួនភ្លាមៗ ។
សកម្មភាពបាញ់ប្រហារនេះ កើតឡើងនៅក្នុងទីក្រុងហ៊ែនឡូវ៉ា (Handlova) ស្ថិតនៅឯភាគកណ្តាលប្រទេសស្លូវ៉ាគី ដែលប្រព័ន្ធផ្សព្វផ្សាយស្លូវ៉ាគី បានរាយការណ៍ថា ជនបង្កគឺជាបុរសអាយុ ៧១ ឆ្នាំម្នាក់ ដោយករណីនេះ បានធ្វើឱ្យប្រទេសតូចមួយ ស្ថិតនៅក្នុងតំបន់អឺរ៉ុបកណ្តាល មានការភ្ញាក់ផ្អើលជាខ្លាំង រួមទាំងទាក់ទាញការថ្កោលទោសពីអន្តរជាតិថែមទៀតផង ។
ទោះជាបែបណាក្តី នៅមុននេះបន្តិច ទីភ្នាក់ងារសារព័ត៌មាន Reuters បានធ្វើបច្ចុប្បន្នភាពចំពោះស្ថានភាពនេះ ដោយរដ្ឋមន្ត្រីបរិស្ថានរបស់ស្លូវ៉ាគី បានលើកឡើងដោយជឿជាក់ថា ដំណើរការវះកាត់ដំណើរការដោយរលូន ហើយលោកសង្ឃឹមថា ស្ថានភាពរបស់លោកនាយករដ្ឋមន្ត្រីនឹងមិនគំរាមកំហែងដល់អាយុជីវិតទៀតនោះទេ ។ ខណៈប្រភពមួយទៀត បានប្រាប់ទៅកាន់សារព័ត៌មាន Aktuality.sk ដោយអះអាងថា លោកនាយករដ្ឋមន្ត្រីស្លូវ៉ាគី ទទួលបានការវះកាត់ដោយជោគជ័យ និងស្ថិតនៅក្នុងស្ថានភាពល្អប្រសើរឡើងវិញ ។
ដោយឡែក ប្រព័ន្ធផ្សព្វផ្សាយស្លូវ៉ាគីបានរាយការណ៍ផងដែរថា អ្នកបាញ់ប្រហារគឺជាអតីតសន្តិសុខនៅផ្សារទំនើបមួយកន្លែង និងជាអ្នកនិពន្ធកំណាព្យ រួមទាំងជាសមាជិកនៃសមាគមអ្នកនិពន្ធស្លូវ៉ាគីថែមទៀតផង ដោយសារព័ត៌មាន Aktuality.sk បានដកស្រង់សម្តីកូនប្រុសរបស់ខ្មាន់កាំភ្លើងថា ឪពុករបស់លោកជាអ្នកកាន់កាំភ្លើងដោយស្របច្បាប់ ប៉ុន្តែលោកមិនដឹងថា ឪពុករបស់លោកមានបំណងអ្វី ឬគាត់បានគ្រោងទុកអ្វី និងមានអ្វីកើតឡើងឱ្យពិតប្រាកដនោះទេ” ។ គួររំឮកថា ប្រទេសស្លូវ៉ាគីដែលមានប្រជាជន ៥.៤ លាននាក់ ជារដ្ឋសមាជិករបស់អង្គការអូតង់ និងសហភាពអឺរ៉ុប ហើយមានប្រវត្តិតិចតួចបំផុតពាក់ព័ន្ធនឹងអំពើហិង្សាផ្នែកនយោបាយ ៕
ប្រភព៖ Reuters Connect/ Reuters
រូបភាព៖ Reuters/ CNN
