ភ្នំពេញៈបុរសម្នាក់បានធ្វើអត្តឃាតដោយប្រើកាំភ្លើងខ្លីបាញ់ចំក្បាលខ្លួនឯងបណ្តាលឲ្យស្លាប់ក្នុងថ្លុកឈាមបង្កភ្ញាក់ផ្អើលកាលពីវេលាម៉ោង០៧និង៣០នាទី ព្រឹក ថ្ងៃទី២២ ខែវិច្ឆិកា ឆ្នាំ២០២០ ស្ថិតនៅចំណុចក្នុងផ្ទះ ផ្លូវបេតុង ក្រុម៣ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខរាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះឈ្មោះ អ៊ីវ លាងអ៊ាង ភេទ ប្រុស អាយុ ២៩ឆ្នាំ មុខរបរ រៀនជួសជុលរថយន្តស្នាក់នៅកន្លែងកើតហេតុខាងលើ។វត្ថុតាងបន្សល់ទុកនៅកន្លែងកើតហេតុ៖អាវុធខ្លីចំនួន០១ដើម ក្បាលគ្រាប់ចំនួន០១គ្រាប់ សំបកគ្រាប់ចំនួន០១។
សមត្ថកិច្ចបន្តថា តាមការបំភ្លឺពីឈ្មោះ គីន ឡាក់ស្រ៊ីន បានប្រាប់ថា ជនរងគ្រោះទើបតែត្រឡប់ពីធ្វើការនៅប្រទេសកូរ៉េ បានចំនួន៣ខែ ហើយចូលមកស្នាក់នៅ ក្នុងផ្ទះកើតហេតុបានចំនួន០១ខែជាង ដើម្បីរៀនជាងជួសជុលរថយន្ត។ហើយកន្លងមកមិនដែលដឹងថាជនរងគ្រោះ មានប្រើប្រាស់អាវុធទេ ទើបរហូតដល់ព្រឹកថ្ងៃទី២២វិច្ឆិកា ២០២០ វេលាម៉ោង ៧និង.៣០នាទី ខ្លួនបានចុះពីជាន់ឡៅតឿ មកក្រោមគោលបំណងទៅធ្វើការ ស្រាប់តែ ឃើញជនរងគ្រោះដេកស្លាប់ មានឈាម និងឃើញមានកាំភ្លើងខ្លី០១ដើមនៅជាប់ជនរងគ្រោះ។
ប្រភពបានបន្តថា ភ្លាមនោះខ្លួនបានខលហៅ គីន លឹមហុង និង ឈ្មោះ កើត រ៉ែង ឲ្យយករថយន្តដឹកជនរងគ្រោះ ទៅសង្រ្គោះនៅមន្ទីរពេទ្យ តែពេលទៅដល់មន្ទីរពេទ្យ គ្រូពេទ្យបានប្រាប់ថាជនរងគ្រោះស្លាប់បាត់ទៅហើយ។ ពេលនោះ ក៏ដឹកសពត្រឡប់មកផ្ទះកើតហេតុវិញ ទើបធ្វើឲ្យមានភ្ជាប់ផ្អើលដល់ សមត្ថកិច្ចជំនាញក៏បានចុះទៅដល់កន្លែងកើតហេតុ ធ្វើការស្រាវជ្រាវនិងធ្វើកោសល្យវិច័្ចយ ទីតាំងកន្លែងកើតហេតុនិងលើជនរងគ្រោះ។
ក្រោយការសន្និដ្ឋានរបស់ លោកឧកញ៉ា វិជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យ អមសាលាដំបូង រាជធានីភ្នំពេញ បានបញ្ជាក់ថា ជនរងគ្រោះស្លាប់ដោយសារ បាញ់ខ្លួនឯង ចំក្បាល ពីខាងស្តាំ ទៅឆ្វេង ចំនួន០១គ្រាប់។
បច្ចុប្បន្នសព ជនរងគ្រោះ ប្រគល់ឲ្យក្រុមគ្រួសារយកទៅតម្កល់ធ្វើបុណ្យតាមប្រពៃណី នៅវត្ត ក្រាំងធ្នង់ ។
