ឧត្តរមានជ័យ: ប្រភពកន្លែងកើតហេតុបានឱ្យដឹងថា ករណីគ្រោះថ្នាក់ចរាចរណ៍មួយឡានលុចស៊ីសRX300ពណ៌ទឹកប្រាក់មួយគ្រឿងពាក់ស្លាកលេខ.ភ្នំពេញ .AV.7202 បើកបរបោះពួយយ៉ាងលឿនស្លេវខណ:ដែលតៃកុងកំពុងស្រវឹងស្រាជោគខ្លួនហើយក៏បានរ៉េចង្កូត ទៅបុកដើមឈើទាំងកម្រោល តែសំណាងល្អពុំមានប៉ះពាល់ដល់អ្នកធ្វើដំណើរតាមដងផ្លូវគ្រាន់តែខ្ទេចខ្ទីឡានមួយកំណាត់មុខយ៉ាងដំណំផ្ទុះពោងសុវត្ថិភាពបើកទៅមុខលែងរួច។
ប្រភពពីកន្លែងកើតហេតុខាងលើដដែលបានបន្តថា មុនដំបូងឡើយគាត់បានឃើញរថយន្តម៉ាកលុចស៊ីសខាងលើបើកបរបោះពួយយ៉ាងលឿនស្លេវពីត្បូងទៅជើងលុះមកដល់កន្លែងកើតហេតុក៏បានរេចង្កូតបុកដើមឈើទាំងកម្រោលយ៉ាងពេញទំហឹងតែម្តង។
បើយោងតាម ប្រភពពី មិត្តភក្តិអ្នកបើកបរបើកឡានបុកដើមឈើផ្ទាល់បានរៀបរាប់ប្រាប់ថា មុនកើតហេតុពួកគាត់បាននាំគ្នាទៅហូបស្រាអស់ប្រមាណជាជិតមួយកេសតែអ្នកបើកបរផឹកច្រើនជាងគាត់ ទើបស្រវឹង ខ្លាំងបែបនេះរហូតដល់បាត់បង់ស្មារតី។
ក្រោយកើតហេតុក៏ឃើញមាន សាច់ញាតិ ម្ចាស់ឡានខាងលើមកដល់ទីតាំងកើតហេតុនិងបានហៅ ឡាន ផ្សេងមកសណ្ដោងដើម្បីយកទៅយានដ្ឋានធ្វើការជួសជុលហើយក៏មិនបានរំខានដល់សមត្ថកិច្ចនគរបាលចរាចរណ៍ដែរ។
សូមជម្រាបថា ករណីឡានលុចស៊ីសបុកដើមឈើនេះ ពុំមានប៉ះពាល់ដល់ បុគ្គលណាឡើយគ្រាន់តែខូចខាតរថយន្តមួយកំណាត់មុខយ៉ាងធ្ងន់ធ្ងរតែប៉ុណ្ណោះនេះពិតជាសំណាងក្នុង១ពាន់គ្រោះថ្នាក់។
សូមបញ្ជាក់ថា ហេតុការណ៍គ្រោះថ្នាក់ចរាចរណ៍បង្កឡើងដោយខ្លួនឯងនេះដែរបានកើតឡើងនៅលើផ្លូវជាតិលេខ៦៥ស្ថិតនៅក្នុងភូមិឈូក សង្កាត់សំរោង ក្រុងសំរោង ខេត្តឧត្តរមានជ័យនារសៀលថ្ងៃទី១៧ខែមីឆ្នាំ២០២៥។ឈឿន ប៊ុនឈី
