សម្តេចក្រឡាហោមអញ្ជើញជាអធិបតីក្នុងពិធីប្រកាស់តែងតាំងអភិបាលខេត្តពោធិសាត់ថ្មី

ខេត្តពោធិ៍សាត់÷ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅព្រឹកថ្ងៃទី២១ ខែវិច្ឆិកា ឆ្នាំ២០២២ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាសតែងតាំងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ថ្មី ជំនួសឯកឧត្តម ជាវ តាយ ដែលផ្ទេរទៅកាន់មុខតំណែងជារដ្ឋលេខាធិការក្រសួងមហាផ្ទៃ។

ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ថ្មីបានមានប្រសាសន៍ឡើងប្តេជ្ញាចិត្តថា ការទទួលបានមុខតំណែងជាអភិបាលខេត្តនេះ ជាកិត្តិយសធំធេងនិងថ្លៃថ្លាបំផុតក្នុងអាជីពជាអ្នករាជការ និងបានចាត់ទុកថាជាវិញ្ញាសារថ្មីមួយក្នុងការបំពេញតួនាទីនិងភារកិច្ចរួមចំណែកកសាងអភិវឌ្ឍន៍ប្រទេសជាតិ មាតុភូមិ ក្នុងពេលបច្ចុប្បន្ននិងអនាគត។

សូមបញ្ជាក់ថា ឯកឧត្តម ខូយ រីដា មានអតីតភាពជាអភិបាលរងខេត្តពោធិ៍សាត់ និងត្រូវបានផ្លាស់ទៅកាន់មុខតំណែងជាអភិបាលរងខេត្តបាត់ដំបង។ កាន់មុខតំណែងជាអភិបាលរងខេត្តបាត់ដំបងបានជាង៩ខែ ឯកឧត្តមក៏ទទួលបានសេចក្ដីទុកចិត្តពីថ្នាក់ដឹកនាំ ស្នើតែងតាំងជាអភិបាលខេត្តពោធិ៍សាត់វិញ៕

#ដោយលោកអ៊នអឿម