មេក្លោង និងបក្ខពួក ២នាក់ រួមទាំងគ្រឿងញៀន និងកាំភ្លើងចំនួន ៥ដើម ត្រូវសមត្ថកិច្ចក្របូចបាន

ខេត្តរតនគិរី:សមត្ថកិច្ចមូលដ្ឋានបានឱ្យដឹងថា ក្រុមជនសង្ស័យជាមុខសញ្ញាពាក់ព័ន្ធគ្រឿងញៀន ត្រូវបានកម្លាំងសមត្ថកិច្ចឃាត់ខ្លួនបានមេក្លោង និងបក្ខពួក ២នាក់ រួមទាំងគ្រឿងញៀន និងកាំភ្លើងចំនួន ៥ដើម។ ការបង្ក្រាបនេះ ស្ថិតក្នុងភូមិសាមុត្រក្រោម ឃុំសេដា ស្រុកលំផាត់ ខេត្តរតនគិរី។

សមត្ថកិច្ចបានឲ្យដឹងទៀតថា ជនសង្ស័យជាមេក្លោង ត្រូវបានសមត្ថកិច្ចធ្វើការតាមស៊ើបអង្កេត ២ឆ្នាំមកហើយ រហូតដល់យប់ថ្ងៃទី៥ ខែកម្ភៈ ឆ្នាំ២០២៣ សមត្ថកិច្ចបានប្រើវិធានការជំនាញ ទើបកំណត់បានមុខសញ្ញាច្បាស់ឈានដល់ការឃាត់ខ្លួនតែម្តង។

សមត្ថកិច្ចបន្តថា ដោយសារតែពេលវេលានោះយប់ផងក្រែងមិនមានសុវត្ថិភាព សមត្ថកិច្ចបានប្រើប្រាស់កម្លាំងចំនួន ២០នាក់ ដើម្បីហ៊ុំព័ទ្ធពេញមួយយប់ លុះព្រឹកឡើងនៅថ្ងៃទី៦ ខែកម្ភៈ ឆ្នាំ២០២៣ ទើបកម្លាំងសមត្ថកិច្ចសម្រុកចូលចាត់ការតែម្ដង។ ដោយឃាត់ខ្លួនជនសង្ស័យចំនួន ៣នាក់ ក្នុងនោះមានមេខ្លោងម្នាក់ ជាមុខសញ្ញាជួញដូរចែកចាយ និងប្រើប្រាស់។

សមត្ថកិច្ចដដែលបន្តថា ក្នុងការបង្ក្រាបនេះ ដកហូតវត្ថុតាងបានរួមមានដូចជា: គ្រឿងញៀនចំនួន ៤ថង់ ក្នុងនោះមាន ១ថង់ធំ ព្រមទាំងដកហូតអាវុធបានចំនួន ៥ដើម ៖ Akបត់១ដើម Akស្វាយ១ដើម គ្រាប់Akចំនួន៣៤គ្រាប់ អាវុធកែឆ្នៃចំនួន៣ដើម ផាវគ្រាប់បែកចំនួន៥២គ្រាប់ គ្រាប់កង់ចំនួន៥៤គ្រាប់ កាំបិតចុងស្រួច ចំនួន៦ដើម និងសម្ភារៈសែបគ្រឿងញៀនមួយចំនួនទៀត។

បច្ចុប្បន្នជនសង្ស័យរួមនិងវត្ថុតាងថ្នាំញៀន អាវុធ ត្រូវបានកម្លាំងសមត្ថកិច្ចជំនាញកំពុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី។