ប៉ៃលិន ៖ ឪពុកម្តាយទាំងខាងកូនក្រមុំ និងកូនកម្លោះ នាំគ្នាយំលែងចេញ ដោយសារតែកាលពីល្ងាចថ្ងៃទី១៦ ខែមីនា ឆ្នាំ២០២៥ នេះ នៅចំណុចសំបូរ ក្នុងភូមិភ្នំកុយ ស្រុកសាលាក្រៅ ខេត្តប៉ៃលិន ខណៈពេលដែលលោកអាចារ្យចៅមហា កំពុងតែសូត្រមន្តប្រទានពរជ័យដល់គូរស្វាមីភរិយាថ្មី នាថ្ងៃចូលរោងការដំបូង ត្រូវបានភ្លៀងលាយឡំដោយខ្យល់កន្ត្រាក់បោកបក់មកពីទិសខាងលិចបណ្តាលឱ្យប៉ើងរោងនិងសម្ភារៈការអស់គ្មានសល់ ។
ចំណែកឯព្រះសង្ឃ និងលោកអាចារ្យចៅមហា ព្រមទាំងភ្ញៀវប្រុសស្រីបាននាំគ្នារត់ចែកជើងរកកន្លែងជ្រកដើម្បីមិនឱ្យមានគ្រោះថ្នាក់ តែសំណាងល្អមិនបណ្តាលឱ្យមានមនុស្សណាម្នាក់រងរបួសនោះទេ គ្រាន់តែប៉ើងស្បៃរោង និងកម្រាលតុរប៉ាត់រប៉ាយ និងកៅអីរៀបចំម្ហូបអាហារដួលរៀបដល់ដីគ្មានសល់ ដែលគួរឱ្យអាណិតម្ចាស់ដើមការស្ទើរខ្លោចចិត្ត ។
ប្រភពព័ត៌មានបានឱ្យដឹងទៀតថា ម្ចាស់ដើមការជាមេបាខាងកូនស្រី ឈ្មោះ ម៉ី ទិត ភេទប្រុស អាយុ៥៨ឆ្នាំ រស់នៅក្នុងភូមិខាងលើ ។ បើតាមប្រភពព័ត៌មានពីលោក នាក់ ឃន មេភូមិភ្នំកុយ បានរៀបរាប់ឱ្យដឹងថា ៖ កាលពីល្ងាចថ្ងៃទី១៦ ខែមីនា ចាប់តាំងពីថ្ងៃរសៀលរហូតដល់ល្ងាចបន្តិច ស្រាប់តែមេឃប្រែទៅជាខ្មៅងងឹតស្លុប មានសភាពអាប់អួរព្រមទាំងខ្យល់បក់បោក មកពីទិសខាងលិច លុះមួយស្របក់ក្រោយមក ឃើញមានភ្លៀងធ្លាក់លាយឡំទៅដោយខ្យល់កន្ត្រាក់យ៉ាងខ្លាំង បណ្តាលប៉ើងដំបូលផ្ទះប្រជាពលរដ្ឋរងការខូចខាតអស់មួយចំនួនរួមនិងរោងការ១ផងដែរ ។
លោកបន្តទៀតថា រហូតមកដល់ពេលនេះ ខាងលោកកំពុងដើរចុះស្រង់ទិន្នន័យ តែនៅមិនទាន់បូកសរុបធ្ងន់ធ្ងរប៉ុណ្ណា ឬស្រាលប៉ុន្មានខ្នងផ្ទះនោះទេ។ លោកមេភូមិបានបញ្ជាក់ទៀតថា ចំណែកនៅក្នុងកម្មវិធីរៀបអាពាហ៍ពិពាហ៍មួយកន្លែង ក្នុងភូមិរបស់លោក ដែលម្ចាស់ដើមការបានរៀបចំតុកៅអីជាច្រើនបម្រុងនឹងទទួលភ្ញៀវ ពិសារអាហារនាល្ងាចថ្ងៃដដែលនោះ ស្រាប់តែត្រូវខ្យល់បក់បោកគំហុកយ៉ាងខ្លាំង បណ្តាលឱ្យប៉ើងដំបូលរោងការខូចខ្ទិចខ្ទីអស់គ្មានសល់ ធ្វើឱ្យបែកកែវ ចាន ឆ្នាំង និងសម្ភារៈការមួយចំនួនទៀត ធ្វើឱ្យម្ចាស់ដើមការទទួលរងការខាតបង់អស់ជាច្រើន។
ទោះបីជាភ្លៀងលាយឡំខ្យល់កន្រ្តាក់ បណ្តាលឱ្យប៉ើងដំបូលផ្ទះប្រជាពលរដ្ឋ និងប៉ើងរោងការ តែមិនបង្កឱ្យមានបញ្ហាគ្រោះថ្នាក់ដល់អ្នកភូមិ ឬសត្វចិញ្ចឹមណាមួយឡើយ។ លោកមេភូមិបន្ថែមទៀតថា រហូតមកដល់ថ្ងៃទី១៧ ខែមីនានេះ មេឃនៅតែបន្តខ្មៅងងឹត ដែលអាចនឹងមានការធ្លាក់ភ្លៀងថែមទៀត ដូច្នេះ លោកក៏អំពាវនាវឱ្យបងប្អូនប្រជាពលរដ្ឋរស់នៅក្នុងភូមិត្រូវមានការប្រុងប្រយ័ត្នខ្ពស់ចំពោះបញ្ហាគ្រោះធម្មជាតិដែលកើតឡើងជាយថាហេតុ។
សូមបញ្ជាក់ថា នៅដើមឆ្នាំ២០២៥នេះ ទើបតែមានបញ្ហាខ្យល់កន្ត្រាក់ខ្លាំងកើតឡើងជាលើកទី១ ដែលធ្វើឱ្យប៉ើងដំបូលផ្ទះប្រជាពលរដ្ឋ តែមិនមានករណីរន្ទះបាញ់ឆក់យកជីវិតមនុស្សសត្វណាមួយនោះទេ ៕
