ខេត្តបន្ទាយមានជ័យៈរថយន្តប្រភេទយក្សយីឌុបដឹកជ្រូក១គ្រឿងបានរ៉េរចង្កូតទៅបុកបង្កាន់ដៃស្ពានបណ្តាលឲ្យប្លោងធ្លាក់មកដីស្លាប់មនុស្ស១នាក់ ៦នាក់របួសស្រាល និង ៦នាក់របួសធ្ងន់នៅវេលាម៉ោង៣និង៤០នាទីល្ងាច ថ្ងៃទី១៨ខែកញ្ញា ឆ្នាំ២០២០ លើកំណាត់ផ្លូវជាតិ៥៨ ចំណុចស្ពានលេខ៤ ចន្លោះបង្គោលគីឡូម៉ែត្រ លេខ២៣-២៤ ស្ថិតក្នុងភូមិប្រាសាទ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
នគរបាលស្រុកអូរជ្រៅបានឲ្យដឹងថា រថយន្តបង្កគ្រោះថ្នាក់ដោយ ខ្លួនឯងនេះ ម៉ាកហ៊ីយ៉ាន់ដាយ ពាក់ស្លាកលេខ កំពង់ចាម. MA.8759 ជារថយន្តផ្ទុកទំនិញធុនធ្ងន់ដឹកសត្វជ្រូកបើកបរពីទិសខាងលិចទៅខាងកើតមានអ្នករួមដំណើរចំនួន១៣នាក់នៅក្នុងរថយន្ត។
លោកអធិការបានបញ្ជាក់ឲ្យដឹងទៀតថា; នៅពេលដែលកំពុងបើកមកដល់ចំណុចកើតហេតុស្រាប់តែរថយន្តបានរ៉េចង្កូតទៅខាងស្តាំបុកនឹងបង្កាន់ដៃស្ពានពេញទំហឹងបណ្តាលឲ្យរថយន្តប៉ើងទើលើបង្កាន់ដៃស្ពានជាប់ពាក់កណ្តាល ចំណែក្បាលរថយន្តបានធ្លាក់ទៅនឹងដីសង្កត់ស្លាប់អ្នករួមដំណើរម្នាក់ ចំនួន៦នាក់បានរងរបួសធ្ងន់និង៦នាក់ទៀតរបួសស្រាល ត្រូវបានដឹកទៅសង្គ្រោះនៅមន្ទីរ ពេទ្យបង្អែក ក្រុងប៉ោយប៉ែត ចំណែកអ្នកបើកបរក្រោយពីកើតហេតុបានរត់គេចខ្លួនបាត់ស្រមោលតែម្តង ។
ក្រោយកើតហេតុរថយន្តត្រូវបាននគរបាលជំនាញចរាចរណ៍ស្រុកអូរជ្រៅរៀបចំស្ទូចយកមកទុកនៅអធិការដ្ឋាន នគរបាលស្រុកអូរជ្រៅ ដើម្បីរកម្ចាស់និងអ្នកបើកចូលខ្លួនមកដោះស្រាយតាមច្បាប់។
