កំពត:ឯកឧត្តមអភិសន្តិបណ្ឌិតស សុខាឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.)បានជំរុញពលរដ្ឋចូលរួមវេទិកាសាធារណៈ និងកម្មវិធីនានាដែលរៀបចំដោយអាជ្ញាធរ ដើម្បីទទួលបានព័ត៌មាន លើកសំណើសំណូមពរនិងជាជំនួយក្នុងការសម្រេចចិត្ត។
ឯកឧត្តមអភិសន្តិបណ្ឌិតបន្តថា នេះជាផ្នែកមួយនៃការលើកកម្ពស់លិទ្ធិប្រជាធិបតេយ្យ និងសិទ្ធិសេរីភាពប្រជាពលរដ្ឋលើជោគវាសនាឃុំ សង្កាត់របស់ពួកគាត់។ ឯកឧត្តមអភិសន្តិបណ្ឌិតសសុខាបានលើកទឹកចិត្តពលរដ្ឋឱ្យសកម្មចូលរួមបញ្ចេញមតិយោបល់ឱ្យបានច្រើនចំពោះគម្រោង និងកិច្ចការងារនានាក្នុងមូលដ្ឋានរបស់ខ្លួនមិនថាមណ្ឌលសុខភាពសាលាបឋមសិក្សា និងសាលាឃុំ។
ឯកឧត្តមអភិសន្តិបណ្ឌិត បានមានប្រសាសន៍បែបនេះនៅក្នុងពិធីដឹកនាំគណៈប្រតិភូជាតិ និងអន្តរជាតិទស្សនកិច្ចការអនុវត្តការងារគណនេយ្យភាពសង្គម នៅក្នុងមូលដ្ឋានខេត្តកំពត រួមមាន៖ នៅសាលាបឋមសិក្សាអង្គជុំ សាលាឃុំស្នាយអញ្ជិត ក្នុងស្រុកជុំគិរី និងនៅសាលាខេត្តកំពត មុនបន្តទស្សនកិច្ចនៅមន្ទីរពេទ្យអនុស្សាវរីយ៍ ស៊ុនយ៉ាឃៀល ក្បែរជើងភ្នំបូគោ។ទស្សនកិច្ចនេះ មានការអញ្ជើញចូលរួមពីឯកឧត្តម សក់ សេដ្ឋាទេសរដ្ឋមន្ត្រីទទួលបន្ទុកបេសកកម្មពិសេសនិងជាអនុប្រធានអចិន្ត្រៃយ៍ គ.ជ.អ.ប. តំណាងស្ថានទូតអាល្លឺម៉ង់ ស្ថានទូតអូស្ត្រាលី ទីភ្នាក់ងារសហប្រតិបត្តិការសម្រាប់ការអភិវឌ្ឍរបស់ប្រទេសស្វីស តំណាងធនាគារពិភពលោកកម្មវិធីធ្វើឱ្យប្រសើរឡើងដល់ការផ្ដល់សេវាជូនប្រជាពលរដ្ឋតំណាងក្រសួងអប់រំយុវជននិងកីឡាតំណាងក្រសួងសុខាភិបាល ព្រមទាំងថ្នាក់ដឹកនាំ និងមន្ត្រីជាន់ខ្ពស់នៃលេខាធិការដ្ឋាន គ.ជ.អ.ប.។
គួរកត់សម្គាល់ថា ការងារគណនេយ្យភាពសង្គមបានផ្ដោតលើការកំណត់ឱ្យមានការអនុវត្តនៅមូលដ្ឋានឃុំ សង្កាត់ តាមគោលការណ៍ដូចខាងក្រោម៖នៅសាលាឃុំស្នាយអញ្ជិត ដែលនៅទីនោះ លោកមេឃុំ ស្មៀន បានធ្វើបទបង្ហាញអំពីសកម្មភាព និងគម្រោងអភិវឌ្ឍន៍ឃុំពាក់ព័ន្ធនឹងការងារគណនេយ្យភាពសង្គមខណៈអ្នកស្ម័គ្រចិត្តក៏កំពុងពិភាក្សាជាមួយពលរដ្ឋដើម្បីរកមតិកែលម្អគម្រោងនានាក្នុងឃុំ។
