(បន្ទាយមានជ័យ) ៖ នៅព្រឹក ថ្ងៃសៅរ៍ ១១រោច ខែកត្តិក ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី១៩ ខែវិច្ឆិកា ឆ្នាំ២០២២នេះ ឯកឧត្ដម សេរី កុសល អនុប្រធានក្រុមការងាររាជរដ្ឋបាលចុះមូលដ្ឋានខេត្តបន្ទាយមានជ័យ និងជាតំណាងរាស្ត្រមណ្ឌលបន្ទាយមានជ័យ អមដំណើរដោយ ឯកឧត្តម លោកជំទាវគណប្រតិភូបានចុះជួបសំណេះសំណាលជាមួយប្រជាពលរដ្ផជាង២០០០នាក់ នៅបរិវេណ វត្តតាវង ភូមិតាវង ឃុំពន្លៃ ស្រុកភ្នំស្រុក ខេត្តបន្ទាយមានជ័យ។
ជាមួយគ្នានោះ ឯកឧត្តម សេរី កុសល បានផ្ដាំផ្ញើការសួរសុខទុក្ខ ពីសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្ដិព្រឹទ្ធិបណ្ដិត ប៊ុន រានី ហ៊ុនសែន ជូនដល់បងប្អូនប្រជាពលរដ្ឋ ក្នុងឃុំពន្លៃ ស្រុកភ្នំស្រុក ខេត្តបន្ទាយមានជ័យ។ហើយពិធីជួបសំណេះសំណាលនេះ ឯកឧត្តម និងក្រុមការងារ បានរៀបចំនូវនំបញ្ចុក ជូនបងប្អូនប្រជាពលរដ្ឋហូបរួមគ្នាក្នុងបរិយាកាសសប្បាយរីករាយ ស្និតស្នាល និងសាមគ្គីភាពផងដែរ។
ក្នុងឱកាសសំណេះសំណាលនោះ ឯកឧត្តម សេរី កុសល បាននាំយកសារុងមួយ ថវិកា៥០០០រៀល ជាទ្រនាប់ដៃជូនដល់ប្រជាពលរដ្ឋជាង២០០០នាក់ និងលោកតាជីលោកយាយជី ១៣៣ នាក់ ដោយលោកតាជីទទួលបាន អាវសមួយ ខោចែវមួយ ថវិកាមួយម៉ឺនរៀល និងលោកយាយជីទទួលបានសារុងមួយ ថវិកាមួយម៉ឺនរៀល។ ដោយឡែក ឯកឧត្តម បានចូលរួមកសាងសាលាធម្មសភា ក្នុងវត្តតាវង ភូមិតាវង ឃុំពន្លៃ នៅស៊ីម៉ង់ត៍១០តោន និងថវិការ៥០០ដុល្លារ បន្ថែមទៀតផងដែរ៕
ព័ត៌មានថ្មីៗ ទាន់ហេតុការណ៍ 24h✅ដោយ ហុីង ចាន់ថន
