ភ្នំពេញ៖ ប្រមុខការពារជាតិកម្ពុជា សម្តេចពិជ័យសេនា ទៀ បាញ់ និងលោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា បានអញ្ជើញជាអធិបតីភាព ក្នុងពិធីផ្ទេរ-ប្រគល់ រថយន្តចំនួន ១៥០ គ្រឿង និងសម្ភារៈការិយាល័យ របស់ក្រសួងការពារជាតិ នៃសាធារណរដ្ឋប្រជាមានិចិន ជូនដល់ក្រសួងកាពារជាតិកម្ពុជា នៅវិមានឈ្នះឈ្នះ នៅព្រឹកថ្ងៃទី១ ខែកញ្ញា ឆ្នាំ២០២២។
លោកវ៉ាង វិនធាន ឯកអគ្គរដ្ឋទូតចិនប្រចាំកម្ពុជាបានមានប្រសាសន៍ថាៈ ជំនួយដែលក្រសួងការពារប្រទេស នៃសាធារណរដ្ឋប្រជាមានិតចិន បានផ្តល់ជូនរថយន្ត ចំនួន ១៥០ គ្រឿង និងសម្ភារការិយាល័យ ដល់ក្រសួងការពារជាតិកម្ពុជា គឺជាសកម្មភាពជាក់ស្តែង ដែលក្រសួងការពារជាតិចិន ជួយគាំទ្រដល់ការរៀបចំ កិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ។ កងទ័ពកម្ពុជា-ចិន ជាបងប្អូនស្គាល់ចិត្ត ស្គាល់ថ្លើម និងរួមសុខរួមទុក្ខ ជាមួយគ្នា ហើយជាដៃគូនិយាយតិច ប៉ុន្តែធ្វើច្រើន។
សម្តេចពិជ័យសេនា ទៀ បាញ់ ប្រមុខការពារជាតិកម្ពុជា បានមានប្រសាសន៍ថាៈ សម្ភារៈទាំងអស់នេះ ពិតជាមានន័យ មិនអាចកាត់ថ្លៃបាន ក្នុងពេលក្រសួងការពារជាតិកម្ពុជា កំពុងត្រូវការចាំបាច់បំផុត សម្រាប់បម្រើឱ្យការងារទំនាក់ទំនងបរទេសផ្នែកយោធា ជាពិសេស ក្នុងពេលដែលក្រសួងការពារជាតិកម្ពុជា កំពុងមមាញឹកក្នុងការបំពេញតួនាទីដឹកនាំ ក្នុងឋានៈជាប្រធានអាស៊ានសម្រាប់ឆ្នាំ២០២២ផងដែរ។
សម្តេចពិជ័យសេនា បានវាយតម្លៃខ្ពស់ ចំពោះប្រសាសន៍ដ៏មានអត្ថន័យជ្រាលជ្រៅ របស់លោក វ៉ាង វិនធាន ឯកអគ្គរដ្ឋទូតចិន ដែលឆ្លុះបញ្ចាំងនូវការប្ដេជ្ញាចិត្ត យ៉ាងមោះមុត របស់ថ្នាក់ដឹកនាំគ្រប់ជាន់ថ្នាក់ នៃប្រទេសទាំងពីរ នៅក្នុងការងារការពារជាតិ និងលើកស្ទួយ ចំណងមិត្តភាព កិច្ចសហប្រតិបត្តិការ កម្ពុជា-ចិន ក្នុងឋានៈជាមិត្តដែកថែប ឱ្យគង់គង់វង្ស និងរីកម្រើនជានិច្ចតរៀងទៅ។
ប្រមុខការពារជាតិកម្ពុជា បានមានប្រសាសន៍បញ្ជាក់ថាៈ សម្រាប់ស្មារតីជួយយកអាសារគ្នា ក្នុងគ្រាលំបាក ប្រកបដោយឆន្ទៈ គឺជាឧបករណ៍ដ៏មានប្រសិទ្ធភាពបំផុត ក្នុងបុព្វហេតុកសាង ថែរក្សាសន្តិភាព ស្ថិរភាព មិត្តភាព រឹងមាំយូរអង្វែង និងកិច្ចសហប្រតិបត្តិការស៊ីជម្រៅ។ គោលជំហររបស់ក្រសួងការពារជាតិកម្ពុជា ក្នុងការគាំទ្រឥតងាករេ ចំពោះនយោបាយ ចិនតែមួយ និងចក្ខុវិស័យសហគមន៍ វាសនារួម រវាងចិន និងកម្ពុជា៕V/ N
